سنحيا بالقرآن

رمضان كريم 2

سلامو عليكو
ازيكوو جميعا ... منورين بلوجى لو لسة فاكرينه ..
ومعذورين لو ناسينه
دا انا نفسى ناسية ومش عارفة اكتب حاسة انى عاوزة اسخن الاول او كدا .
الواحد بقاله فترة متغيب .. ومنقطع ومش عارفة ايه ..
بقيت بظهر فى المناسبات بس تقريبا ...
كله بسبب الكورسات والانفلوانزا ..والذى من هذا القبيل منهم لله بقى ..
والله وحشنى أوى احساس الفضا وقعدة البيت ..
والزهق والملل والحاجات اللى الواحد مكنش عارف قيمتها السنة اللى فاتت دى .
الحمد لله خطفنا يوم تغيير جو .. والبركة فى دودو بقى كانو 12ساعة جامدين جدن بجد
فرقوا معانا جدن والله .. ويارب نقدر نكمل .. بقيت الكورس اللى مش راضى يخلص دا
انا جاية اقول
كل سنة وانتو طيبين .. رمضان كريم عليكم وعلينا ان شاء الله
يمكن لسة شوية ... بس انا أصلى حاسة انه رمضان جه خلاص .. شامة ريحته ..:d
عمر حد فيكو لما تيجى مناسبة معينة بيحس ان ليها ريحة كدا ...
وبتفكره .. بمود معين ...
يعنى مثلا .. أول يوم رمضان
أول يوم دراسة ...
الشتا .. بيبقى له ريحة حلوة اوووى ... يارب ماتغيبش اكتر من كدا ..
الصيف برضه.. كدا يعنى ..
انا بحس بكدا على طول ... وببقى فرحانة .. بالاحساس دا حتى لو مش عاوزة المناسبة
وبزعل أوى جدن ... لما .. تيجى مناسبة .. وما احسهاش كدا .. زى السنة اللى فاتت فى رمضان . :(
انتو بيحصبل لكوا كدا دا طبيعى يعنى ولامفيش أمل اعيش ولا ايه ؟
:d s:

كل سنة وانتو طيبين .. مرة تانية .. ويارب تكونوا حاسين بـ رمضان كدا .
اللهم بلغنا رمضان وأعنا على الصيام والقيام وقراءة القرآن
Slamz

Mix Feeling

سلام عليكم
ازيكو جميعا؟ ان شاء الله منيحين وبالنتيجة فرحانين
واللى نتيجتهم مش بانت لسة .. مايكونوش قلقانين
ان شاء الله ناجحين ويارب متفوقين

الحمد لله
الاجازة دى .. من بدايتها حافلة بالاخبار والاحداث المتنوعة
هيا اجازة غريبة اه ولا يصح ان يطلق عليها لقب اجازة لحد دلوقتى اه
لكن ..تمام ..كله بيقلب خير ;)

امبارح والنهارة كانو اكتر يومين حافلين بالحاجات والاحاسيس العكس بعضا فى نفس ذات الوقت
أولا:
من يوم الاجازة كل يوم مشاوير للكلية والشركة عشان ناخد الكورس بدل التدريب
والمسؤلة عن كدا الكبيرة للأسف
بعد ستين مشوار من دول وهيا عارفة من الاول انه احنا هناخد فى الشركة دى
وكل يوم بتطلب طلبات تانية عن المرة اللى قبلها ..
مش عارف مرة طلب افادة ومرة محتويات الكورس ومرة ومرة ..
وبعدين اذ فجاة ..
الطلب اترفض عشان الشركة نفسها ...
ليه خير يارب ... اصله الشركة مش كويسة ..
نعم.. يعنى ايه مش كويسة؟؟!
طب ايه وجه الاعتراض على شركة جت عملت ندوة واتنين فى الكلية بتاعتك وبموافقتك؟؟
وبعدين مانتى وافقتى على كل الشركات التانية
الكويس منها والنص نص تقومى ترفضى نيو هورايزون ليه ؟
طبعا السبب مجهول وهيفضل مجهول طول ماهى موجودة
وماتفهموش بقى تفكير البنى ادمة دى عامل ازاى؟
احنا كنا بنشد فى شعرنا امبارح ..
أيا ان كان .. الكورس اللى احنا هناخده دا احسن ما تروح تدريب فى شركة سماد طلخا .
وتفضل هناك ست ساعات كل يوم فى كلام فاضى ومالوش علاقة بشغلك اصلا ..
هترد على تليفونات ...طب شكرا جدن
ولحد دلوقتى مش عارفين هنعمل ايه بالزبط ...
ومنها لله ... الله يرحم أيامك يا دكتور احمد :(

ثانيا :
كتب كتاب اختى" نهى "
:D
بنت عمى كان كتب كتابها امبارح وبقت حرم الاستاذ محمد امين
والفرح يوم الاحد والاتنين الجاين وكلكو معزومين :)
كنت فرحانة اوووى ساعتها لدرجة الدموع
واحلى لحظة وهما بينقلوا الدبل من الايد اليمين للشمال
وعمو قعد يهزر ومكنش راضى يقول زوجتك ابنتى
:D
ربنا يتمم لها على خير يارب .. ويصبرنى على بعدها
:((
وعقبالكو جميعا :D

ثالثا :
نتيجة الترم التانى للفرقة التالتة تكنولوجيا المعلومات ظهرت النهاردة
فى ميعاد غير متوقع خالص واذ فجأة برضه بدون اى مقدمات
وألف مبروك للجميع .. عقبال بقيت الدفعة يارب . وكل حد عايز تقدير يجيبه
وانا برضه مش حاسة بيها :|

لا فرحانة ولا زعلانة .. عادى كدا :|

نفسى نتيجة كل الاقسام تبان مع بعض حتة واحدة عشان احس بفرحة كدا بجد
ويارب نطمن على بقيت صحابنا فى الاقسام التانية

والى احداث اخرى فى اجازة غريبة

سلامز

1000 مبروك

بس كدا

:d

أحلى لحظة

سلامو عليكو
من قبل الامتحانات ماكتبتش هنا حاجة ... اخر يوم امتحانات ..
قضيت يوم عثل مع احلى صحاب فى الدنيا ..
بس .. بمجرد ماروحت انتهى بما انه كل حاجة حلوة عمرها قصير ...
ومع انى كنت هموت واسجل اللحظات الحلوة اوووى اللى حسيتها فى اليوم دا ..
لكن محصلش نصيب ...
فتقريبا من ساعتها ... محستش لحظة حلوة اووووى من دووول غير النهاردة ..
ممكن اقول دلوقتى حالاا يعنى الساعة 3 ونص بليل ..
وبرضه بسبب... نفس الناس اللى حسسونى دا .. اخر يوم امتحانات ...
انا حبيت بس .. اسجل اللحظة دى ...
واقول ربنا يخليكوا ليا ياحلى صحاب فى الدنيااا ...
بجد ..بيكوا الدنيا بتفرق جدااااااا

i miss all of U

مبادئ المذاكرة

سلامو عليكو ..
ازيكو يا ناس ياللى عندكو امتحانات ان شاء الله ..
بما ان الامتحانات اهى جاية ..
وان شاء الله الناس هتذاكر .. يارب يعنى ...
فلازم نوفر لنفسنا الجو الملائم لمثل هذا الوقت من كل ترم .. ونستعد استعدادا كويسا ..
فبيقولك بقى من أهم خطوات الاستعداد للمذاكرة .. وتوفير هذا الجو ...

1- قوم صلى لك ركعتين واقرأ لك جزء قران ولا حاجة .
2- قوم بوس ايدين أهلك كلهم وضيوفكم... .وتوكل على الله واطردهم بره البيت ..
أو احبسهم فى أوضة عازلة للصوت .
3- لو ليك أخ اسمه أحمد وأصغر منك باربع سنين فيما تحت
توكل ع الله برضه واقتله ونحتسبه عند الله شهيدا .
عشان هو ياإما هيبقى نايم وهينيمك معاه ..
ياإما .. هيفتكر فجأة انه ظريف ودمه خفيف ..
وهيجى يثبت لك دا وكل شوية كركركووور وحاجات كدا
ياما كل ماتقوله امشى ياض اناعاوزة اذاكر .. هيجى يقولك ايه الهبل اللى بتذاكره دا .
ياما هيسحب حضرتك لـ
mbc action ) & ( movie max)

4- تتخلص من أثار أى حاجة ممكن تتاكل أو تتشرب فى نفس الاوضة اللى انت حبست الناس فيها من شوية ..
عشان كل شوية هتبقى حاسس انك جعان وعطشان وحاجات كدا ..

5- اقطع كابل التليفون الارضى الرئيسى بتاع الحى كله دا عشان ابقى قابلينى لو الشركة جت تصلحه .

6- إرمى شريحة موبايلك أو استخدم موبايل ميمى ..
(بلا فخر 24 ساعة فى اليوم غير متاح او مغلق ربانى بدون أى تدخلات ميمية).

7- --- اذا مذاكراتك ع الجهاز .. سليدز وغيره ..
* حضرتك .. لازم تمسح الألعاب اللى عندك كلها .. عشان هى بتبقى عندك طول السنة ..
بس ايام الامتحانات .. بتبقى ممتعة جداا .. وبتبقى هتموت وتوصل لأعلى سكور فى حياتك ..
*كمان لازم تشفر كل الصور اللى عندك وتنسى الباص ورد ..
عشان بما ان صحابك هيوحشوك فى الاجازة .. فبتفضل .. تتفرج عليهم وتعيط بقى وكدا .
* ياريت برضه تشيل تصطيب اى برنامج ماسنجر عندك .
* اقطع كابل النت خالص لوسمحت.
--- واذا الحمد لله مذاكراتك مش على الجهاز ..
* ياريت تولع فى المشترك بتاع الكمبيوتر خالص عشان ما تعرفش تفتح الجهاز خالص.

8- الخطوة دى أساسية جدا ..
افتح كل شبابيك البيت على مصرعيها عشان كل الناموس اللى فى الدنيا .. ينتشر فى الشقة ..
واستحمل بقى العقاب الإلاهى اذا وذك شيطانك وحاولت تنام ولا حاجة .. وابقى قابلنى لو عرفت تنام فى حياتك ..

9- كرتن ( حطهم فى كراتينهم يعنى ) التليفزيون والريسيفر والحاجات اللى من النوع دا .

10- إياااااااااااك ومصطلح "خمس دقايق بس "
اللى هو هنام خمس دقايق بس ...وهقوم على طول ..
طيب هفتح النت خمس دقايق بس اشوف حاجة ...
طب خمس دقايق تليفزيون ..اللقطة دى بس ..دا الفيلم دا فظيع وماشوفتوش قبل كدا ..
الخمس دقايق دول ..أيام الامتحانات بيتقلبوا لمضاعفتهم على طول .. يعنى لو ارداتك كويسة .. ومكنتش قرفان من المذاكرة والايمدج والايه أى
والبلاوى اللى عندك دى ..
ممكن يبقوا عشر دقايق .. وهتلاقيك بتقوم لوحدك ماشاء الله ..
انما لو مش طااايق نفسك والجو حر وايمدج طابقة على نفسك ..
أكيد انهم هيمتدوا بقدرة قادر ..50 دقيقة ...5 ساعات ...وربنا يستر ومايبقوش 5 أيام ..
على فكرة كل دا بفرض انك أصلا عاوز تذاكر
P:

يلا اتمنى ننفذ

كل بوست امتحانات وانتو طيبيــــــــــن

وأبقوا قابلونى فى الحلقة الجاية
:D
----------------------------------------------

عاوزة أقول لباشمهندسة "هبة " .. وأبارك لها .. على وصول ..
ابن اختها
"فارس "
بالسلامة ..
نورت الدنيا يا فوفو
وطبعا بندبسها على الهواء مباشرة فى السبوع ..
وعقبالكم جميعااا
D:

سلاااااااااامز

شخابيط 4

سلام عليكم
ورحمة الله وبركاته
كيفكوون زوارى وزائراتى الكرام ..
انشلااا منيحين وكويسيين كدا...
بغض النظر انه فى بوست الرحلة وقع من البلوج..
بس بوست النهاردة له بعض العلاقة بالرحلة برضه ..(أنظر بقيت البوست )
:D
النهاردة شخابيط 4 ان شاء الله ...
وتقريبا انا واقعة فى برطمان ..
كارتون وانمى ..
والفضل فى ذلك للباشمهندز احمد اخويا ..
وقنوات (mbc3) ومجموعة (Space Power)
والكلام اللى مش فاضى دوت ..
فطبعا احب اوجه له شكر فظيــــع ..
لو الحاجات اللى انا شخبطتها دى ..
عجبتكم..
وكمان لازم اقول له اعتذار على الهوا عشان اتضطح انه....
القنوات دى مش للأطفال بس ..
زى ماكنت بتهمه ..
وبرامجها حلوة جدا على فكرة
:D

هيا بنا
الى الشخابيط

!
!
!
!

YU-Gi-Oh

SaKura 1

SaKura 2

Naruto?

Konan


InuYasha

Martin MysterySpongeBob



Flower
Friends!

Dooby

Dooby-2

Dooby-3

ِ
Animeِ

My Mobile Theme

يارب تكون عجبتكم الشخابيط

ٍSlamz

موجز الاخبار

السادة والسيدات الكرام
لكم منى
أفضل التحية والسلام
أما بعد
أعلن ..مطار كلية الحاسبات والمعلومات
عن عودة الرحلة رقم 1 القادمة من دولة القاهرة الشقيقة ..
ووصولها أرض الوطن .. مدينة المنصورة ..
هذا .. وقد تأجل .. عودة الركاب الى منازلهم ...
عشان الشيت اللى كان هيتسلم وما اتسلمش وعشان محاضرة ..
كانت اخر محاضرة ومطلعتش ..
هذا وسنوافيكم ببعض تفاصيل النشرة الإخبارية ..
وتقرير عن احداث الرحلة واكتشافاتنا الهااامة بها ...
انتظرونا بعد الفاصل ..

دمتم بود
خالص تحياتى

كان معكم من أمام الجهاز ..
MeMe
:D

تصبحوا على خير

أنا والقاموس وهواك

وربنا وربنا كنت بمنع نفسى انى اكتب ..
بس خلاص بقى مش معقول كدا
كل اللى بيحصل وانا كاتمة فى قلبى و ساكتة ..
المهم أخوانى واخواتى ..
بعد السلام والتحية ..
خير اللهم اجعله خير ..
انطلق منذ قليل مدفع أسبوع المطحنة الدولية .. برعاية عميدة الكلية ..
أول يوم كان بطاطس مقلية والتانى كان مهلبية ..
أخدنا يوم ريست .. يمكن نذاكر ..المادة الغبية
انا كنت عارفة انها رخمة ومفترية...
بس وربنا ماتخيلت كمية الرخامة دى منها ..
فظيعــــــــة ....
أبشع مادة شوفتها فى حياتى ...
دا التربية الوطنية كانت توحفة على كدا..
قاعدة أضغط على نفسى م الصبح عشان أقرأ بس أى حاجة ...
عشان مش هينفع أروح بيــض خالص كدا
واكتشفت من محاولاتى انى مابعرفش حاجة فى الانجليزى ..
أو الكلام اللى مكتوب خارج نطاق معلوماتى الصراحة ...
جبت القاموس ...
طلع هو كمان مابيعرفش حاجة فى الانجليزى ..
D:
ومفيهوش معانى الكلمات اصلا ..
لا قاموس الـ " جيب اليأس " نافع ... ولا" المورد " نافع ..ولا كوكل نافع طب ايه بقى ؟
:((
مفيش فايدة... يبقى الوضع كما هو عليه
:|
دا انا سجلت أكبرscore النهاردة فى فتح القاموس ..
وكل دا من شابتر واحد أمال لو كنت كملت..!
ومن أهم
نتائج ما سببه القاموس ... الحول بعيد عنكم....خير يارب وبدون مقدمات
شوفت معنى كلمة... intensity
" كنافة "
وماتسألونيش ازاى
وراسى وألف جذمة ...اعرف ازاى كنافة يعنى ايه اللى دخلها بالموضوع ..
وتربست تربسة ..
مجاش فى دماغى أى معنى تانى غير كنافة
مع انها معروفة فى كل حتة .. كثافة ...
وأنا عارفاها برضه وربنا ..
بس ساعة الحول ..بقى ..
ماعلينا ...
المصيبة ان كمية الحماس اللى عندى عشان اذاكرها ...
بتستنفذ لما افضل ادور ع الكلمات ...
والمصيبة الاكبر ..

انى ببقى حاطة امل انى لما الاقى الكلمات يمكن افهم المادة ..
بس مابيحصلش
وهناك ايضا مصيبة أكبر وأكبر ...
الساعة واحد الا عشرة..والامتحان بكرة ....
وانا ولله الحمد ...
معاياالانترودكشن و شابتر واحد ...
دا لو افتكرت حاجة م اللى قريته ..
وعاوزة اناااااااام
:((
نيلة ..منيلة بنيلة ...

:(( :(( :((

ربنا يستر

ادعولنا

2X1 شامبو وبلسم

سلام عليكم ورحمة الله وبركاته
بقالى قرن ونص عاوزة اكتب هذا البوست ..أو أى بوست ... على أعتبار انى بس أعبر البلوج شوية ...
بس انتو عارفين المشغوليات والبزنس وكدا .

كلام فاضى طبعا ...
انا هنشغل فى ايه...؟؟
هو انا أه مشغولة فى حاجات بس مش عارفة هما ايه ...
يمكن الدراسة ..مشروع وتاسكات
وخطوبة بين قوسين " أختى "
وشوية نكد كدا محترمين ... طبعا دا تحت رعاية ...
ماكينات العكننة المتنقلة ... جمعيات محبى النكد للجميع..
تحت شعار
ليه تتنكد لوحدك لما ممكن تنكد ع الكل.
و وراك وراك ... هنجيبك من قفاك ..
وتروح يمين تروح شمال ..تفتح ايميل أو ماتفتحش ..وراك وهنخليك ماترتحش ..
وحاجة زى الفل ...
عموما ..
أنا أيقنت ... انى مابقتش طايقة خلاص لاحد ولا حتى نفسى ...
ومش هنظبط غير باجازة من البشر ..
ومن نفسى ايضا...ودا اساسى يعنى ..
بجد وحقيقى ..
عايزة اخد اجازة من أى حاجة ممكن البنى ادام يفكر أو ينشغل أو يهتم ...بيها.
دا غير انه مطلوب منى
"فى الفترة دى"
اختار حاجات كتيــــر أوى وكلهم عكس بعض ...
أو بمعنى أصح ملهومش علاقة ببعض
وانا بجد ..مش عارفة أعمل ايه اصلا ..
وانا عاوزة اختار ايه؟؟ وليه؟؟
وكل حاجة بتدخل فى بعضها.. وبتتغير فى ثانية..
ومش عارفة ازاى أخد اجازة من التفكير اصلان ؟
أعمل ايه؟
انا مش هكمل كتابة فى الموضوع دا عشان معدلات الاكتئاب ماترتفعش عند الناس بسببى ..
أكتر من كدا
وكمان لأنى حااالا اتصدمت انه خير اللهم اجعله خير ... يارب

امتحان الميدترم
"المقترح"
بين قوسين
" اللى غصبا واقتدارا هيتنفذ واحنا بس بنبلغكم بالأمر تحصيل حاصل"
يوم 11 أبريل
واحسبوا انتو بقى فاضل كام يوم

انا لله وإنا إليه الراجعون


-----------------------------

نيجى بقى للموضوع الأهم اللى سبته للأخر عشان نحلى بيه وكدا
وكان نفسى برضه الدنيا تبقى متظبطة عن كدا وبتاع ...
وانا بقول كل سنة وانتى طيبة لــ
بنى أدماية ماشاء الله عثولة جدااا ومحترمة جدا ..
ومجتهدة جدا وبحبها جدا جدا .. وحد مهم أوى بالنسبة لى ..
x:
وهى برضه واحدة من الاقرب 4 بنى ادمين لـــــقلبى فى كليتنا المحروسة
وذلك طبعا مش بمناسبة عيد حب ام العمال ..

لالالالالا
دا بمناسبة يوم ميلادها" العشريـــن "
وهى الباشمهندسة ..
e_emy
وفى رواية اخرى ..

7aseb@ Queen
عقبال مايبقوا 200
:) كل سنة وانتى طيبة ومبسوطة وفرحانة ومتفوقة
ومعانا وفاكرانا وربنا ينولك كل اللى بتتمنيــه ويوفقك ..
ويهديك للى فيه الخير ليك دايما اللهم أمين .
وبجد ربنا يخليكى ليا ويحرمكيش منى
:* :* :*

Happy Birth Day To U

saht saht shaaaa
:-p

طبعا البوست دا مش لله والشعب
انا عاوزة الجاتو يابت انتى ...
:-p

سلاااامز