احترم نفسك ..
أها احترم نفسك ...دا شعار حملة جديدة .. برعاية شباب مجلة كلمتنا ...
الحملة بدأها شباب مجلة كلمتنا شهر مايو 2008
انا .. بصراحة لسة عارفة موضوع الحملة دا النهاردة من برنامج العاشرة مساء ..
المهم .. انا كنت مبسوطة أوى وانا بسمع رأى الشباب الرجالة ...
عن رأيهم فى الولاد اللى بيعاكسوا او بيسيئوا للبنات فى الشارع ...
حسيت فعلا ان لسة فى رجالة بتخاف على بناتها وحريمها حتى لو البنات دول فعلا اللى غلطانين ....
والاحساس دا للأسف مع احترامى لأى ولد أو راجل هيقرأ الموضوع ...
مابقاش يتحس بسهولة الايام دى ...
المهم ... القائمين على الحملة ..
قالوا ان فكرتها بدأت لما .. ايميل جه على الجروب بتاعهم ع الفيس بوك ..
من حد بيحكى مشهد ...
لأم وبنتها ماشيين فى شارع مصرى ..
وتعرضوا للتحرش من ولد فى الشارع .. وتزايد عدد الولاد اللى عملوا كدا
واللى يخوف .. كان فى رد الشارع المصرى اللى مليان ناس ..
اللى منهم بدأ يصور بالموبايل .... واللى ... فضل يتفرج ويصقف ...واللى قال وانا مالى ... وكمل طريقه أو فضل قاعد مكانه
ولا همه حاجة ...
لحد .. وبعد كتــــــــــير ... سواق تاكسى هو ..اللى شد حزامه وضرب فى الولاد دول ...
بس كان فى وقت الست وبنتها خلاص ... بقوا فى انهيار شديد من اللى حصل لهم ....
ده غير حكايات البنات اللي بتوصل على إيميل المجلة كل يوم ..حكايات تخلي الحجر يتحرك ...!!
على أد ما موقف الولاد اللى عاكسوا دا .. ضايقهم اوى طبعا ...
بس فعلا اللى يضايق أكتر واكتر .... موقف رجالة الشارع المصرى
وبدأوا فى الحمله بعد كدا ...وما زالت ان شاء الله
و عملوا استفتاء بين 100 شاب و شابه ووجدوا نتائج مخيفة
1- 94% من البنات تعرضن للتحرش ونشك ان الباقي فاهم أصلا يعني إيه تحرش؟
2- 50 % رد فعلهم سلبي
3- 64 % بتخاف تحكي لأهلها !!
وسألواالشباب رد فعلهم لو شافوا ولد بيتحرش ببنت
14 % منهم قال "ماليش دعوة "
34 % قال هتدخل لكن بشرط تكون محترمة !
20 % قال لو شكلها مش محترم هعاكس معاهم !!
طب عايزين ايه من الحملة .. او ايه اهدافها ؟؟؟
منقولة عن كلامهم ع الجروب ع الفيس بوك
- عايزينك تعرف إيه هو التحرش ؟
- عايزينك تتعلمي إزاي تتصرفي لو حد ضايقك في الشارع
- نفكر كلنا في طرق مبتكرة تحمي بيها البنت نفسها
- عايزين الولاد يعرفوا قد إيه الحكاية دي مؤذية لكل بنت
- نرجع تاني نخوة ولاد البلد لما كان واحد يشوف بنت بتتعاكس
- عايزين الأهالي تعلم بناتها إزاي تتصرف ويكون ليها رد فعل لو اتعرضت لأي حاجة في الشارع
- عايزين الأهالي تفهم ان البنت ضحية مش عشان اتعاكست يبقي لازم تكون هي السبب
- عايزين قانون واضح ضد التحرش عشان من حقنا كلنا نعيش بحرية.........!
- ويمكن نتستغني عن ده كله
لولقينا من تاني نخوة ولاد البلد...الشهامة ...الجدعنة...الدم الحامي ...باختصار معنى الرجولة !
طب أزاى كل دا هيحصل ؟؟؟
هنعمل لقاءات شبابية هنتكلم فيها عن كل حاجة ...
وهيشاركنا فيها متخصصين في الطب النفسي والدفاع عن النفس وحقوق المرأة.
- انتاج فيديو كليب يشارك فيها الشباب والنجوم.
- هننزل الشوارع
- الجامعات
– الكافيهات وفي كل مكان ...
طب ايه المطلوب مننا عشان نساهم فى الحملة دى ؟؟؟
- تشاركنا..
تقول لكل أصحابك ..
اكتب معانا في مجلةكلمتنا...
شاركنا بتجاربك..أراءك ...
شاركنا في لقاءتنا الشبابية وورش العمل اللي بنظمها خلال الحملة...
عايزين نوصل بالجروب لأكتر من مليوووووووون شخص..
عشان نآثر بجد ...يلا محتاجينك معانا مجلة كلمتنا
--------------------------------------------------------------
انا قلت لازم اتكلم فى الموضوع ..دا
بجد كنت عايزة اتكلم فيه من زمان أوى ...
كنت بتكلم انا وواحدة صاحبتى فى حاجة زى كدا ... من شهرين تقريبا ..
وكانت بتحكى لى عن واحدة صاحبتها ...
اتعاكست ... بس بطريقى ضايقتها اوى ...وكدا ..
أنا كان ردى ..
ان البنات هما الى بيبدأوا ...يعنى البنت طالما محترمة ولابسة محترم ...
مهما كان الولد مش كويس ...أو بيستظرف ...
هيتكسف يعاكسها أو يضايقها ...
وكان هى رأيها ... انه ليه لا ..؟؟؟ ان الولاد هى اللى تغض بصرها عن البنات حتى لو مش لابسين خالص ...
وان الولاد هما اللى غلطانين وهما اللى بيبدؤا وكدا ...
النهاردة بقى سمعت فى البرنامج برضه انه ...
اتعملت دراسة .. على نوعية البنات اللى بيتعاكسوا ...
وكانت على ست انواع ( دا على حد قول اللى عملت الدراسة)
وجدوا ان أكتر نوعين بيتعاكسوا فى الشارع المصرى ....
هما النوع الخامس : المحجبات .
والنوع السادس : المنتقبات .
يعنى المشكلة فى مين دلوقتى ؟؟؟ ولاد ولا بنات؟
طب لو نوع المحجبات فيه كلام شوية .. انه مش كل المحجبات محجبات فعلا والكلام دا
طب المنتقبات .. ياجماعة ؟؟ مالهم ؟؟
طب ايه المطلوب من البنات فى رأيكم يا شباب عشان ....مش تتعاكس ...
ولا انت مش فى رأيك انهم مطلوب منهم حاجة أصلا؟؟
وانتن يا بنات ... شايفين ايه؟؟؟ مين اللى بيبتدى بالغلط؟؟
مستنياكم ...
سلاااااااااامز
Urs
MeMe
14 Yorum var:
سلام عليكم ورحمة الله وبركاته
موضوعك تتتتتتتتتتتتحفة يا ميمى بجد
بصى المطلوب انك كل واحد يحترم نفسه ههههههه بجد اصل زى مافى ولاد وحشين فيه بنات وحشين
ومش كل حاجه ممكن نرميها على التربية او أسرتهم الاسرة مسئولة تزرع الاخلاق فيهم لحد لما يكبروا وعليهم انهم يحافظوا عليها... فى الناس ف المجتمع بتأثر على بعض ...وفيه ناس بتتأثر بالايجابيات وناس بالسلبيات
وحكاية ان لبس البنت او شكلها مؤدب ولالا هى فعلا عامل اساس ف انها متخليش حد يعاكسها بس فيه شباب مش فاهمين حاجه ومش بيسيبوا حد ف حاله!!
ف النهاية
ربنا يهدينا جميعا
وياااااااااارب الحملة دى تنجح
وترجع ف الناس الشهامة والرجولة الى ضاعت دى
يلا كفاية كده سلالالالام يا بت
اولا اشكرك بجد على الموضوع وعلى اهتممك بيه
انا بقالى فترة بسمع عن حملة احترم نفسك بس مكنتش مركزة معاها وكنت عاوز اعرف ايه النظام
بجد شكرا على توضيحك
والله وانا بقرا البوست جسمى كان بيقشعر
بحس بمنتى القرف لما احس ان النخوة ماتت كدة
وفى بعض الجمل استفزتنى اوى
زى الولاد اللى بيقولو لو مش محترمة هعاكس معاهم
بجد دة بقى موضوع خطير اوى ومحتاج مننا اهتمام كبير ولازم كلنا نشتر فى اننا نعالجهونحله على اد ما نقدر
الغلط فى بعض الحالات بيبقى على الولاد بس يعنى ممكن تكون البنت مهذبة فى طريقة مشيها ولبسها محترم وتبع الدين
لكن بتبقى فيه شباب مريض مبيفرقش وهيعاكس يعنى هيعاكس ان شاالله تطلع حتى اخته
وفى حالات كتير البنات هى اللى بتكون السبب الرئيسى
مش بس عشان لبسها زفت ونيلة
لا وكمان بتلاقيها ماشية كدة بتقول حد عاوز يعاكس
بجد ربنا يهدى شباب الامة وبناتها
ويصحى النخوة فى قلوب رجالتها
تحياتى :)
السلااااام عليكم
انا اول زيارة ليه للمدونة بتاعتك وده اول موضوع افاراْه بس بجد مهم جداا
انا اول مرة اعرف عن حملة احترم نفسك دى
بس بيكى بجد على الموضوع الرائع ده
بس ما انكرش ان فى بنات هى اللى بتدعى الشباب انهم ياعكسوها بس المحترمين اكتر طبعا
تحياتى
حلوة الحمله
وحلوة الفكرة
ياريتنا نقدر نخلص من العادة السيئه دى
ياريت نكون مطمنين على اهلنا وهما ماشيين فى الشوارع
ياريت
مازلت برضه يا ميمي عند رأيي ان الغلط من البنت
انتى بتقولى اكتر فئة بتتعاكس المحجبات والمنتقبات وانتى قولتى المحجبات عادي لان فى محجبات اى كلام جدا
وبرضه نفس الكلام اللى انتى قولتيه ع المحجبات ينطبق ع المنتقبات
فيه منتقبات هما فعلا اللى بيخلوا الشباب يعمل معاهم كده والله
طبعا النقاب حاجة كويسه جدا بس برضه حسب اللى لابساه
فيه كتير اوى لابسينه مش بنية كويسة اعتقد هما دول اللى فى الاحصائية
السلام عليكم
والله يا ميمي انا لو اتكلمت من هنا للصبح مش هقول كل اللي عايزاه
اولاا الموضوع مستفز لابعد الحدود بجد
ثانيا بقي انا مش هقول غير كلمتين
لو الولد اللي بيعاكس فكر قبل ما يعمل كده ان ده ممكن يحصل لحد من اخواته او والدته او بنته مش هيعاكس لانه رااجل وميرضاهوش لاهل بيته
اما بقي لو مش همه يبقي ده مش رااجل اصلااا
بس
وشكراا يا جميل علي الموضوع
سلاام
اسلام عليكم
ازيك يابت ياميمى
ايه الموضوع الجااامد اوى اوى ده
بس بجد حملة حلوة اوى ربنا معاهم ويقدروا يعملوا حاجة فعلا
والموضوع ده اصلا مهم اوى
ولازم الكل ياخد باله منه
سواء ولد او بنت والله كله المفروض يحترم نفسه
يعنى البنت تلبس كويس وتعمل اللى عليها والولد يحترم نفسه هو كمان ولما تكون واحدة محترمة المفرووض يعنى مش تتعاكس
ونخلى القيم الاسلامية الجميلة بتاعتنا تسيطر علينا اكتر من سيطرة الشيطان
وربنا يهدى شباب وبنات المسلمين
ويرشدهم للطريق الصح ان شاء الله
موضوع حلووو اوووى بجد ياميمى والله
وربنا يوفق الشباب دوول فى حملتهم بإذن الله
ســـــلام ياحبيبتى
جميله الحمله وجميله اهدافها
فعلا النتايج والاحصائيات اللي انتي قلتيها مخيفه
ولو اني بشك في اي احصاء يتعمل في مصر
وزي مننتي قلتي البنات المحجبات دلوقتي مشكوك في حجاب معظمهم (الا من رحم ربي)
ربنا يهدي شباب وبنات المسلمين يارب
ليكوريكا
انا بقالى يومين تلاتة كدة بتحاشى الموضوع ده ومش عاوزة اتكلم فيه
عامة انا اول مرة اسمع عن الحملة دى معلش سمعى تقيل شوية لكن الفكرة جميلة جدا وان شا ءالله تجيب نتيجة
بالنسبة للمعاكسات اكيد معظم البنات دا اذا ماكنش كلهم اتعرضوا ليها
بغض النظر محجبة ولا لا
السبب والحل هاتختلف فيه الاراء
وغض النظر بالرغم من انه حل مش بيجيب نتيجة فى زمانا ده وخصوصا جوة حاجة اسمها جامعة الا انه دليل على شخصية اللى قدامى
المهم واخدة بالك انتى لافيت ودورت وماقولتش رايي بردو .. لا انا ليا مزاج اغلس عليكى شوية بس هههه
نفسى اشوفك والله
ســــــــلام
والله ياريت الحملة دي تبقي فعاله فعلا
تبقي حلتلنا مشاكل كتير اوي
صدقيني المشكلة مش مشكلة لبس البنات بقدر مهي مشكلة الشباب
في مدونة اسمها تحرش صاحبتها بتحكي لحالات التحرش اللي اتعرضت ليها وهي عندها سبع سنيين بشكل ماسوي يبينلك انها فعلا تعرضت للاغتصاب النفسي
وكنت قبل لما ادخل علي طول بتكلم مع مدونة صديقة
صاحبة مدونة لا تمسني
فبصيت علي الموضوع من اكتر من زاوية
وفعلا الموضوع مؤلم اوي
وجميل انكو بداتو بالحل ده وانا علي اتم الاستعداد للمشاركة الفعليه
تقبلي مروري وخالص تحياتي
حملة فعالة !!!
يا جماعة انتوا بتنفخوا في قربة مقطوعة، أنا مش باكسر مجاديف بس باتكلم بواقعية .
المشكلة أكبر من مجرد توعية أو إرشاد ، لأننا ساعتها ح نتعامل مع ضمائر ونفسيات معقدة يصعب أو يستحيل معرفة مدي استجابتها ظاهريا.
المشكلة هي كيفية محو التباين الشديد بين ما يشاهده الشباب من صور الإنحلال علي التلفاز أو الإنترنت وبين ما هو مطلوب منهم من التزام أخلاقي في حياتهم اليومية .
الحل الوحيد صعب جدا ويكمن ضمن حدود العائلة ألا وهو التربية الصحيحة.عدا ذلك فهو من قبيل التجارب وتضييع الوقت.
والفتاة ليس مطلوبا منها أي شئ ، فأي فتاة في العالم معرضة للمعاكسة ، ولكننا لا نري عندنا إلا أقبح وأوسخ أنواع المعاكسات ، لقد ذهلت من مقطع فيديو تم تصويره لمئات الشباب يلهثون وراء فتاه في أحد الأعياد ، مشهد لا يمكن نسيانه ولا يمكن رؤيته في أي مكان في العالم.
حينها علمت أن المشكلة لن تحل ، يعني مفيش فايدة.
برجاء تقبل رأيي المتواضع ودمت بكل خير
تمام باشمبرمجه ... بس انا اعتقد ..ان في موضوع كمان تزامن مع الحمله دي
http://www.masrawy.com/News/Egypt/Politics/2008/august/18/harassment1.aspx
ممكن توضح الحملة دي حاجات كتير ممكن ما تكونش مبرره
شكرا علي الموضوع
انتى فين
ان شاء الله يكون المانع خير
اسم الحمله هو الحل فعلا
احترم نفسك للاتنين للشباب والبنات
لو البنت لبست كويس والشاب غض بصره . هنوصل فعلا للاحترام واللي يخالف لازم يكون في تصرف
مقدرش اقول البنات تتصرف هتعمل ايه تمسك في خناقه يعنى ما كدا هتزيد قلة الاحترام
لكن لو في اى مكان اى راجل معدى ايه يمنعه انه يتدخل ويمشى البنت ويتكلم بلسانها هو
الا طبعا لو تطاول بالايدى هيكون رد البنت ابلغ من السكوت في شيء جميل بيتلبس في الرجل كدا ( ابو ورده ) هههههههههه
وساعتها تبقى بهدله ببهدله بقى مش مهم
بس ليه كل واحده مش تعمل كنترول علي نفسها وهى نازله تبص في المرايه كدا هل دا ينفع يتخرج بيه في الشارع منغير ما حد يعلق عليها ويضايقها
والولاد دايما لازم تفتكر ان البنت اللي ماشيه ممكن تكن مراته او اخته او بنته في يوم من الايام حتى لو محترمه مهو داين تدان
خالص احترامى وتقديرى ليكى علي اثارة الموضوع دا
Sen de yaz