كل سنة وانتم طيبين .
بس المرة دى بمناسبة سنة دراسية جديدة وان شاء الله سعيدة علينا كلنا .
النهاردة نزلنا الجامعة ومش عايزة اقول انا كنت مستنية اليوم دا ازاى بجد
بس كنا متفقين اننا هنروح بعد الكورس وكانت المشكلة انه كل صحابنا اللى نازلين الجامعة هيكونوا مشيوا
على مانطلع من الكورس الساعة 2
فكنا متضايقين انه ممكن مش نشوفهم ..
المهم الحمد لله كلمونا قبلها بيوم قالوالنا ان السيشن دى اتلغت ... ويااااااااااه ع الفرحة اللى كنا فيها بجد .
الحمد لله..هنروح ونشوف البنات بدرى :)
- منمتش طول الليل... كأنها ليلة عيد بالنسبة لطفل صغير... مستنى انه هيروح يتفسح بكرة .
قلقانة وعمالة افكر ...مش فاهمة ليه ..
المهم نزلنا الجامعة . ... انا مش متخيلة منظرى بجد ...
عمالة ادور فى وشوش الناس اللى حواليا عشان بس الاقى حد من حاسبات ....أى حد
بس فضلنا ماشيــــــــــيييــــن
ومش لاقينــا روحنا عند الكلية ... احساس جميل اوى انى شايفة المبنى بتاعنا ..
ومكانا اللى كنا معسكرين فيه دايما .. والكشك ... وأحلى أيام بجد .. كل ماعنيا تروح فى أى إتجاه ..
افتكر حاجة كانت حصلت فيه ...هنا كنا بنضحك وبنهيس وبندمع ... هنا كنا بنحسبن على فلان والكلية وفى اللحظة الفلانية .. =))
محدش متخيل بجد الكلية والحاجات دى كانت وحشانى أزاى؟؟؟!!
يااااااااااااااااااه
وصحابنا بدءوا يجوا .. حبة ورا حبة ... وبنسلم وكدا ...
احنا كنا واحشين بعض اوى ...
بس معرفش ليه .. بالرغم من كل دا
انا كنت حاسة حاجة غريبة ... أوووووووى فى وشوش كل الناس اللى شفتهم ...
انا حسيت بالغربة ...!!!!
مش عارفة ليه بجد.. بس على اد ماانا كنت فرحانة اننا مع بعض .. حسيت .. .. بالغربــــــة
ودخلنا المبنى عشان التكريم ... بتاع الاوائل يعنى ...(وطبعا انا مليش دخل بيه نوهائى )
بس إيمااااااااااان درويش .... يعنى أنا بالضبط ...مش قادرة اوصف لكم فرحتى بيها كانت ازاى ...
ايمان كانت ال 6 ع الدفعة وبجد بجد هى تستاهل الاولى ع الدفعة بجدارة وبإذن الله ... السنة دى توصل للمركز دا
رنبا يكرمها ...
والسابعة ع الدفعة كانت .. وساااااااام ... ربنا يكرمها وان شاء الله اشوفها زميلة عزيزة ;)
يعنى اتنين من شلتنا اوائل ياجدعان ... ماشاء الله ربنا .. يحميهم يارب ويارب على طول مفرحينا كدا
قولوا أمين
وبجد وطبعاا فرحنا لفاطمة وهى ماشاء الله ....الاولى ع الدفعة ...
ونيرة وزهراء كمان اتكرموا ... ماشاء الله السادسة والخامسة على دفعة سنة رابعة...
ربنا يكرمهم ويارب دايما التفوق يااااارب .
ومفيش مانع من .. عقبالنا طبعاا ...:)
وطلعنا وكملنا .. سلامات ع الناس اللى جت بعد الحفلة
وعمو الغريب بتاع استطلاع
انه البيضة ب 75 قرش ... وانا مالى ياعم انت
ثم انت مين أصلاا؟؟
واذ فجأة واحنا قاعدين .. لاقينا عربيات ..كتيرر ...BMW
وعربية تلفزيون وكاميرات وحاجات غريبة كدا ..
ودخلوا المبنى بتاعنا ..أخدوا نصيبهم من التريقة شوية .. بس لحد دلوقتى مش عارفين مين دول ..
بس هو ان شاء الله مش الوزير أكيد
وكنت هموووووووت واصور المبنى فى أحدث حالته بجد .. بس كل المحاولات باءت بالفشل ...
ومشينا ولسة بجد احساس الغربة دا عندى بفظاااااااعة ...
بس عاااااامة انا أول يوم بالنسبة لى هيكون أول يوم انزل الجامعة فيه
بعد العيــــــــــــــــــــد
ان شاء الله
وكنا ميتين م التعب كلنا بجد والحمد لله لاقينا مواصلااات على طوول طبعاا .
ماتنسوش ياجماعة شعارين ...
1- قانون المرور الجديد "ليه تتمرمط قليل لما ممكن تتمرمط أكتربكتيــــر"
2- لما تحب تركب تاكسى لازم تسأل السواق "حضرتك تحب تروح فين ..."
وحسبى الله ونعم الوكيل .
16 Yorum var:
ههههههههههه
متفكرنيش بالمواصلات
بس اليوم كان جميل اووى بجد
وكنت فرحانه انى شوفت كل الناس الى بحبهم
بس معتش عاوزه اروح تانى بقه
معرفش ليه "ربنا يستر"
المهم بقه بجد انا كمان كنت فرحانه ب ايمان ووسام ربنا يوفقهم يارب
عقبالك يابت لما اشوفك من الاوائل
ويارب كلنا نتفوق يـارب
حكاية انك حاسه بالغربه
مش عارفه وانا كمان
حاسه ان كل حاجه اتغيرت
يلا ربنا يستر
بس كنتى وحشانى اووى يابت
يلا سلام وكل سنة وانتى طيبة
انا مش عارفه احساس الغربه ده ايه حاجه غريبه فعلا ويارب يختفى على اول الدراسه ان شاء الله
كويس انى منزلتش دلوقتى اصل انا حالفه بالله ما اشوف حاسبات دلوقتى خالص نهائى يعنى ههههههههههههه تقل يابنتى والتقل صنعه اتعلموا بقى :D
بس تصدقى ياميمى انتى وحشانى اوى يابت ايه ده حاجه غريبه هههههههههههههه بجد وحشانى يابت والله
والف الف مبروك للاوائل من كل الدفع ويارب دايما ف تفوق وبروجرس :D
c u soon isA :)
حلو فرحتك بنزول الجامعه
بس ليه احساس الغربه؟
يمكن بس علشان لسه ما اخدتيش على الجو تانى بعد الأجازة
ربنا يعينك
e_emy :
ربنا يخليكى ليا وتكونى أول رد يا ايمان يارب
المواصلات دى .... ما أحلها يابنتى كل ماانزل من البيت اشكر فى شباب مصر ورجالتها وسواقينها وطرقها ...وتاكسياتها... ياسلاااااام هى دى مصر ياجدعااان ...
وعلى فكرة انا كمان عندى احساس انى مش عايزة اروح تانى بس مش عايزة اصدقه كتير عشان ما اعيش فيه
واليوم كان حلو فعلا عشان شوفتكم .. بس بجد كان نفسى يبقى احلى من كدا ...
وحشتينى أوووووووووووى من امبارح والله.
angel
------
تصدقى انك يابت انتى وحشانى أوى ...
منورة البلوج .. بزيارتك وردك.
وعقبال يارب . ماتبقى من الاوائل دول ..
ان شاء الله ..نورتينى
blue wave
-----------
مش عارفة والله يادكتور... حاسة ان كل الناس متغيرين ..مع انى كنت معاهم وبشوفهم وبكلمهم طول فترة الاجازة .
بس مش عارفة ليه حسيت كدا...
نورتنى يادكتور
happy new year بمناسبة الدراسة تاني :D
ان شاء الله يكون عام سعيد , و الاحساس اللي بتتكلمي علية اكيد عشان التعود و ان الواحد بقالو كتير بعيد عن الجامعة و الجو دة بس اكيد هيتغير مع الدراسة
بالتوفيق
:)
ااااااااه
بتعذبوني ليه بس
زعلانه والله انا عشان منزلتش يوميها
هيا الانفلونزا دي ربنا يريحني منها داايما تيجي في اوقات ملهاش لزمه :)
بس بجد والله وحشتوني جداا وكان نفسي اشوفكم
وكل سنه وانتي طيبه يا جميل ان شاء الله تبقي سنه سعيده علينا كلنا شعب حاسبات المتمرمط
وعلي فكره حلوه اووي الشعاارين
سلام
ميمي
ازيك يا ميمي
مقلتيليش اجيلك حاسبات ولا مجيش انا بقول اجي وانادي
يااااااااااااااميمي
وانتي بقي تطلعيلي
المهم بجد مبروك ليكي النجاح وان شاء الله تكوني من المتفوقين زي زمايلك وتكووني احسن كمان
يمكن احساس الغربة عشان بالتدريج بتحسي ان الوقت هيعدي وكلها فترة بسيطة وتخلصي تعليم ومعتيش هتشوفي صحابك زي الاول
لكن ربنا قادر يخرجك من الاحساس ده
وكمان ربنا يجمعك بيهم في الدنيا والاخرة علي خير
نيجي للمواصلات
اوووووووووووووووووووووووووووووف
علي المنصورة ومواصلاتها واسألي مجرب وطبيب
هههههههه
تحيات اخوكي
برقش
ميمى حبيبتى
اول يوم ده كان عسل خاااااااااااااااااااااااااالص
واحسن حاجة بجد اننا كنا مع بعض كلنا كلنا
والله كنتوا وحشينى جداااا حتى لو كنا بنتكلم ع الايميل احساسنا اننا سوا يفرق جااامد
وكان يوم عسووول خالص يارب كل الايام تكون كده
ومحسش بالوحدة فى القسم :(
بالنسبة للمواصلات
انا كرهت النزول بسببها والله
معرفش ايه اللى حصل المواصلات بقت صعبة موووووووووووووووووت
اخر بهدلة والله
ربنا يرحمنا برحمته والله
حلو البوست جدااا ياميمى واحساسها احلى تسلمى ياجميل
ميمى حبيبتى
اول يوم ده كان عسل خاااااااااااااااااااااااااالص
واحسن حاجة بجد اننا كنا مع بعض كلنا كلنا
والله كنتوا وحشينى جداااا حتى لو كنا بنتكلم ع الايميل احساسنا اننا سوا يفرق جااامد
وكان يوم عسووول خالص يارب كل الايام تكون كده
ومحسش بالوحدة فى القسم :(
بالنسبة للمواصلات
انا كرهت النزول بسببها والله
معرفش ايه اللى حصل المواصلات بقت صعبة موووووووووووووووووت
اخر بهدلة والله
ربنا يرحمنا برحمته والله
حلو البوست جدااا ياميمى واحساسها احلى تسلمى ياجميل
ازيك يابشمهندزة ميمى ؟
فعلا اول يوم نزلنا فيه ده كان جميل اوووى بجد .. وبرضو انا حسيت فعلا حاجة غريبة بجد بس مش فى كل الناس فى الناس اللى مكنتش علاقتى بيهم اوى ... حاجة كويسة يعنى الحمد لله .. أو ممكن أكون انا اللى اتغيرت شوية ..الله أعلم بس التغير ده مش عارفة ليه بجد .. يارب يفضل على طول
أما المواصلات بقى ..فسيبيها على جنب لوحدها عشان الكلام عن قرفها مش هيخلص :(
سلااااامز يابه ;) :-*
ميمى
بجد البوست تحفه واصلا يومها كان جاااااااامد جداااااااا
وخاصة اول مشوفتكم بجد احساس لا يوصف
كنتى وحشانى جداا وربنا انتى وكل البنات
واكتر حاجه ضايقتنى انى نزلت متاخر وانتى السبب يابت انك مقولتليش ان الكورس اتاجل وللاسف مشوفتش البنات وهما بيتكرموا
بس بجد كان يوم حلو اووى واحسن حاجه اننا كنا متجمعيين كلنا فى يوم واحد
ربنا يجمعنا على طول وميفرقناش ابداا
يلا سلام بقى وادعيلى اليومين دول يعدوا على خير متنسيش
اهو دايما انا كدة ردى فى الوقت الضايع
معلش ياايمان والله معرفتش اجى كان البرد مدوخنى " الادوية ماكنتش جايبة نتيجة مسك فيا اسبوع تقريبا "" مع انى كنت فى الكلية اليوم اللى قبلها على طول
بس زاد فى اليوم ده ومقدرتش انزل """ اه بصرة يابت ياهاجر انا بردو كان عندى انفلونزا """"
المهم الحمد لله ان اليوم كان جميل وعدى على خير واشوفك بعد العيد ان شاء الله
والف مبروك للى اتكرموا ياجماعة سمعت ان الحفلة كانت تحفة
اه على فكرة الشهادات دى زووقى هههههه مختارها يعنى انا والبت اسراااء ............ بالنسبة للناس والمهرجان اللى بعد الحفلة دا كان رئيس الجامعة واجتماعه باعضاء هيئة التدريس ......... شوفتى كل الاخبار عندى يابنتى اه ماهو انا مش اى حد بردو ههههههههههههه
سلام وربنا يسترها معانا
ازيك يا ندله يا وحشه
حبيت اطمنك عليا ان انا لسه عايشه
ولو سمحتى مش تتكلمى عن احساس الغربه دا
لانى اكتر واحده انا حساه بينكم ..
لو مكنتش انا اسال عنكم محدش بيعبرنى
يالا بقى حبيت اعمل لك عتاب علنى ع البلوج بتاعك وابقى سلمى لى ع السنبلاوين واهلها اوى
يالا بقى سلام
اى مس يو ...
ربنا يشفى الكمبيوتر بتاعك ..
وبالمرة الموبيل ههههههه p:
قلبى عندك ;)
كل سنة وانتى طيبة
ويارب يبقه عيد سعيد عليكى وع اهلك
وحشتينى
Sen de yaz