ألف مبروك وعقبال عندكم ..

سلام عليكم ..

الحمد لله بعد بوست الكآبة بتاع المرة اللى فاتت ..

جاية احكى على يوم .. من أجمل الايام بجد .. اللى كلية حاسبات ومعلومات سبب اساسى فيها..

النهاردة كان خطوبة هبة صاحبتنا ... وزميلتنا فى الكلية ..

واللى واحدة من اجمل الناس اللى عمرى ماكنت هعرفها غير من الكلية

أجدع سلام لحاسبات يابشر

بداية اليوم .. هبة اتصلت بيا تقولى لى ع الميعاد اللى هننزل فيه وكدا.. وطبعا توصية انى مش أتأخر كالعادة

بس اللى مش عادى انى فعلا ماأتأخرتش والخمستاشر طرحة اللى بلبسهم .. اتلبسوا على طول وفى ميعادى ..

بس طبعا لااااااااازم اروح لها متأخر .. ماما أخرتنى ..

البت كانت هتولع فيا بجاز .. بس الحمد لله ..جت سليمة ..

ركبنا .. لسندوب مع سواق وتباع كارهين نفسهم .. بس كنا بنعدى الموضوع .. والحمد لله وصلنا ..

وفضلنا واقفين .. مستنين حاجة تودينا .. لمركز التجمع ( بيت رضوى ).

الحمد لله .. ركبنا برضه .. ووصلنا .. وأجمل حاجة بقى فى الموضوع ...

اننا ركبنا المعدية . D:. وماأدراكم ما المعدية فى وسط النيل يعنى انا فى وسط المية بليل ..

كنت .. هطير م الفرحة بمووووووت فى البحر بجد .. وطبعا انا وهبة .. كنا متظبطين ع الاخر ..

طبعا .. متأخرناش ع البنات اللى كانوا مستنينا ولا حاجة اطلاقا البتة ياجماعة وهما يشهدوا بكدا ..

( ولا ايه.يابنات؟؟ دا حتى توقيت حاسبات )

ووصلنا لهم وكانوا كلهم عسسسل وتجمعنا كان روعة والله

و..كان فى شوية لسة مجوش .. فضلنا واقفين مستنينهم وكدا ..

وبعدين ركبنا مكروباص .. كنا كأننا طالعين رحلة بجد .. ماشاء الله .. كنا فرحانين اووووووى بتجمعنا كدا مع بعض ..

بس برضه كنا زعلانين عشان ناس كتير مش جت.. وفرحتنا كانت ناقصة من غيرهم . (هما عارفين نفسهم طبعا وحسابنا بعدين )

طبعا وتقريبا ..رضوى اللى عارفة مكان البيت وكدا ... وكنا على وشك اننا نتوه احنا والمكروباااااااااااظ .. بس الحمد لله .. وجدنا النور على بيت العروسة ..ووصلنا

فضلنا واقفين نتمرمط شوية ..من العيال الغريبة اللى فى الشارع .. عليهم شوية غلاسة وحبة رخامة عجب ماشاء الله ..

SS فعلا ...

المهم ثوية والبت هبة جت ..

ماشاء الله كانت قمـــــــــر بجد .. كل حاجة عسولة الفستان والميك أب كله كله ..



وجت فى ميعادها ومش أتأخرت والله ماشاء الله

ومامتها وكلهم كانوا زى العسل والله .

وسلمنا بقى واتصورنا .. وكان فى بت كدا فى الشارع ..بين قوسين طفلة .. فى منتهى الرخامة .. حسبى الله ونعم الوكيل ..

كانت عايزة الدبح بس ايمان ظبطتها .

هبة لبست الشبكة .. وكله تمام .. وفضلنا قاعدين معاها شوية ..

وبعدين رحنا راحين لبتاع الدى جى .. عشان يخلص الليلة .. عشان نقعد معاها .. فوق شوية .. قبل مانمشى ..

وطلعنا ..وبهدلنا الدنيا الحمد لله .. حاسبات بقى ;)..

وطبعا طبعا .. الفريق الحاسوباتى كله اللى كانوا هناك .. قرصها فى ركبتها ..

واتصورنا معاها تانى ..

وكان نفسى ترمى الفوكيه وكدا .. بس نسينا نقول لها ..

ومشينا بقى .. بس والله كلنا ماكنا عايزين نمشى خاااااالص

والحمد لله المواصلات كانت تتحسد النهاردة .. ما اتمرمطناش غير نص ساعة بس عشان نركب ..

تتكتب فى موسوعة غنيس ..(بتتكتب كدا باين؟؟)

وطبعا انا قاعدة بقالى يطلع .. ساعتين من ساعة ماجينا ..عشان يتبعت لى الصور ..ع الميل ..

لكن لاحياة لمن تنادى ..

وان شاء الله اليوم يكمل عندنا بنفس ذات الفرحة ياااااااارب



وعقبالكم كلكم ياللى هتقرؤا البوست ..

ربنا معاكم هو طويل أه .. بس بجد ..اليوم كان تحفة ..وحاسة انى قلبته وماقولتش حاجة على فكرة ..

كان نفسى مايخلصش وماابطلش كتابة والله ..

بس خلص..

تصبحوا على خير ...



عقبــــــــــــــــال عندكــــن وعندكم برضه ..:)



سلاااااااااااااااااامز